تجربة تطبيق
myMind: التطبيق اللي جمع لي كل الـ Bookmarks المشتتة في مكان واحد
تجربتي مع تطبيق myMind لحل مشكلة تشتت الحفظ بين تويتر وتيك توك والمتصفح: حفظ من زر Share بدون فتح التطبيق، Auto-tagging ذكي، بحث داخل الصور، ومساحات ذكية بدل المجلدات.
Nawaf Alsheddi
للي يعاني مثلي من تشتت الـ Bookmarks: شي في تويتر، وشي في تيك توك، ومحل حلى في جاهز، وصفحة في المتصفح، وتطبيقات ثانية… كنت أدور حل يجمعها لي، وتكون إضافتها بنفس سهولة حفظ تغريدة في تويتر — بس أبيه يكون أذكى.
فطحت على تطبيق myMind، وتقريبًا هذا أفضل تطبيق استخدمته هالفترة يحل هذي المشكلة.
ليش myMind مختلف؟ الـ Auto-tagging
الميزة الرهيبة فيه مو بس إنه يحفظ الروابط. التطبيق فيه Auto-tagging (وسم تلقائي): يقرأ المقال، ويحلل الصورة أو الموقع اللي حفظته كامل، ويحفظ لك ملخصًا وتصنيفات من نفسه — يريحك من قروشة الترتيب والتصنيف اليدوي.
أفضل ميزة: الحفظ بدون ما تفتح التطبيق أصلًا
لكن أفضل ميزة — واللي خلتني أعتمده — إنك تقدر تحفظ أي رابط بدون ما تفتح التطبيق أصلًا. بس من زر الـ Share يطلع لك prompt سريع تكتب فيه tag أو note لو حبيت، ويختفي بـ 5 ثواني تقريبًا. وكل هذا وأنت ما طلعت من التطبيق اللي تتصفحه.
طبعًا ما يحتاج تضيف tags — هو يقرأ المقالة أو يحلل الصورة ويضيفها لك. لكن إذا عندك tag محدد تبي تضيفه، تقدر تضيفه بسرعة رهيبة.
حل مشكلة تصوير الشاشة
من الاستخدامات الرهيبة بعد إنه يحل مشكلة تصوير الشاشة. دايم نصور منتجات مثلًا أو توصيات مطاعم وغيرها — ومن سناب خصوصًا — وتضيع وتعبي ألبوم الصور، ومستحيل ترجع لها أو تحصلها بعدين.
تقدر تصور الشاشة وتشاركها للتطبيق وتضيف tag أو ملاحظة بدون ما تحتاج تحفظها بالألبوم، ويبقى ألبومك نظيف.
مثل هنا: تعرّف على الكلام اللي في الصور بالعربي، وترجمه، وسجّله بالإنجليزي كامل 😅 — ولو إنه مسمّي البرجر «فيلي ستيك» بس ما يخالف 😂
البحث داخل الصور
والرهيب في التطبيق إنه يقرأ النص اللي داخل الصور. يعني لو صورت شاشة ونسيتها، بس ابحث بأي كلمة كانت مكتوبة جوّا الصورة وبيطلعها لك — وتقدر حتى تبحث بالألوان أو الأشياء.
مساحات ذكية بدل حوسة المجلدات
وبدل حوسة المجلدات، التطبيق يعتمد على مساحات «ذكية» (Spaces) ترتب لك الأشياء تلقائيًا. وفيه ميزة رهيبة اسمها Same vibe: إذا فتحت صورة أو رابط، يطلع لك كل شي حفظته ويطابق «نفس الجو».
يذكّرك باللي نسيته
ما ودي أطولها وأصير راعي ثريدات 😅 بس المميزات اللي في التطبيق رهيبة، مثل هذي: فيه تاب تحت إذا فتحته يوريك أشياء أنت نسيتها، ويسألك تبي تخليها أو تحذفها — بس تسحب يمين ويسار.
فوق هذا، فيه نسخ متصفح رهيبة مرة — شرح سريع لنسخة المتصفح على YouTube.
الخلاصة
أحب الأفكار اللي بأبسط طريقة تحقق الغرض والهدف. التطبيق رتّب لي كل شي بمكان واحد بدون حوسة — والصدق يستاهل ختم @SaadJmz طيّييييبة.
هذا رابط التطبيق على App Store للي يبي يجربه.
نُشر أصلًا كثريد على X بتاريخ 1 مارس 2026 — الثريد الأصلي.